9. Voivo-Bertone-Hoagascht z'Longuyon

Am Samstag, an 12. Mai, is zum neintn Voivo-Bertone-Hoagascht z'Longuyon
von da Monika und am Wuifried eigsogt worn.
Aba weis fia inst a wenge weit war, samma scho am Freida umme gfahrn.
De Roas war recht gmiatle und ohne Spassettl. Nach guad Ding simm Stund,
natiarle mit ara Brotzeit, samma nacha z'Longuyon okemma.
Mir hamma glei eicheckt, de Koffa in d'Kamma brocht und wiama wieda obe kemma,
steht da Wuifried und da Jeroen a scho da.
Mia hamma uns a glei kennt ois Viovofahra und nach Grias Di hi und Servus her war ma scho per Du.
So langsam san aa de andern daher kemma, da Kine Peter, d'Susanne,
da Jochen, da Kai, da Dammerl, da Roland und endlich aa d'Monika.
Und wia ma a wenge schmatzn, wars scho Zeit zum auf d'Nacht essen.
Mei liaba, da Tisserant Gerharte hod scho a griabige Wirtschaft.
Des Menue hod fünf Gang g'hod, grod aso wia mancha Viovo, und da Wein war aa ned vom Graffe.













De Kine Peter is scho a bon vivant. D' Herberg hod a scho guad ausgsuacht.
Den Ambd hamma in da Stub'n ausklinga lassn, bis ma nachad ummara Viertl zwoa in d'Bettstad gfoin san.
Da Samsta war ganz sche zeam. In da Friah san no an Hauffa andane Voivo-Spezen kemma.
Zerscht is a wengal unta d'Motorhaum eine gscheidelt worn, na hamma fotografiert und a wengal an Schmatz g'hoitn.
Umara hoibe zehne hamma na an Ream aufgschmissn.
Do is na so üba Strassl ganga, vista und hott, viere und retour,
dass ma boid gmoant ham, mia miass ma auf da Wiudsau weida reitn.













Da erschte Hoit war an ara Kirch in Dun-Sur-Meuse, ob gotisch oda romanisch woas i ned,
sie war aba recht sche auf am Bugl gleng, wo ma weid seng ham kenna.
Da warn de Michaela und da Robert mit eanam 82er Bertonevoivo a scho do.
Es is na glei weida ganga durch a scheene hüglige Landschaft,
und Strassn mit am Hauffa Reibna bis ma na z'Stenay okemma san.
Mir san na glei ins Biermuseum eine, was recht interessant war und am Schluss war a kloane Wirtschaft,
wo ma uns glei a Hoibe kauft ham.
Des war scho a rechts Schmankerl.



Nächster Hoit: Citadelle von Montmédy. Kirchenbesuch mit Weihnachtsmuse und na hamma no a saubane
Rund'n um d'Festungsanlag draht.
Z'Mittag gessn is na z'Marville worn, oisammt war ma do, bis aufn Guido.
Der hod's ned gfundn,, trotz Navi. Ja mei, mit'm 480er.
De drei Gang vom Mittagessn hod er na auf oamoi abe drucka miassn.
Wiara na fiate war, samma zum Fort du Fermont, Ligne Maginot gfohn, dem "point culminant".
Da Marius, unser guide hod den Schlogbam aufgmacht und mia samma mit de Voivos direkt vor de Festung gfohn.











Es wisst's scho, des is de saim Festung, wos im Fuim den schwoazn 262er Bertonevoivo zsamm gschossn ham.
Zwoa Stund hod de Führung dauert, samma dreisg Meta tiaf unta da Erd gwen,
ham uns de Anlag genau zoagn lass'n und i muas sogn,
da werds da scho a wenig anders und da kimmst zum Nochdenga.
Wia ma olle mitanander wieda an da frisch'n Luft warn, samma zruck nach Longyon und zur Herberg gfohn.
Nächster Tagespunkt: Auf d'Nachtessen. Wieda fünf Gang, a Kaswagerl,
wo ins de Patronnne richtige Schmankerl zsamm gstaid hod und weis oiwa no ned glangt hod, an Dessertteller.
Ins häd's boid z'rissn, aba liaba an Mogn varrenckt, ois wia am Wirt ebbs g'schenkt.
Hint auffe hod ma no abisse ebbs kauffa kenna und mia hamma scho gmoant,
des is a Kaffefahrt und mia miass ma no a Rheumadeckn kauffa.














Ganz zum Schluss san ins no a bor Fuim zoagt woan, vom Hoagascht z'Dornbirn,
achzg Johr Voivo und da Bellwinkel Kai hod ins no zoagt, wias Autofohn im Burgund drent a so is.
Da Sonntag is schnai vozaid, nach da Kaffesupp'n und am Pfia Godsogn hamma an Ream wieda aufgschmissn
und samma hoam nach Niederbayern gfohn.
Mia hamma lauta liabe Leid kenna glernt,
a kultur- und gschichtstrachtige Gengad gseng und vui Freid an de scheena Auto und am Wochenend g'habt.
Nomoi, a herzlichs "Gellt's Gott" an d'Monika, an Wuifried und an Kine Peter, fia de Miah und de vuie Arbat.

AUS IS UND GOR IS UND SCHOD IS DAS WAR IS.

Aba "Auf geht's beim Schichtl" z'Remscheid zum 10. Voivo Hoagascht im Oktober 2007.

Heike und Hans-Peter Krug

PS: Die Frankozismen im Text resultieren aus der Besatzung Bayerns durch Napoleon im 19.Jhd.



Freuen wir uns auf das 10er Bertone Treffen am 13. Oktober 2007 im Remscheid.